ବନ୍ଦେ ମାତରମ୍‌ର ୧୫୦ ବର୍ଷ ପୂର୍ତ୍ତି ଅବସରରେ ଓଡ଼ିଶାରେ ଭବ୍ୟ ପାଇକ ଆଖଡ଼ା ଶୋଭାଯାତ୍ରା

ଜାତୀୟ ସଙ୍ଗୀତ ‘ବନ୍ଦେ ମାତରମ୍‌’ର ୧୫୦ତମ ବର୍ଷ ପୂର୍ତ୍ତି ଅବସରରେ ବର୍ଷବ୍ୟାପୀ ଉତ୍ସବର ଅଂଶସ୍ୱରୂପ ଶନିବାର ଭୁବନେଶ୍ୱରରେ ଏକ ଭବ୍ୟ ଶୋଭାଯାତ୍ରା ଆୟୋଜିତ ହୋଇଥିଲା। ଏଥିରେ ୬୦୦ରୁ ଅଧିକ ପାଇକ ଓଡ଼ିଶାର ପାରମ୍ପରିକ ଯୁଦ୍ଧକଳା ଓ ବୀରତ୍ୱର ପ୍ରଦର୍ଶନ କରିଥିଲେ।

ଓଡ଼ିଆ ଭାଷା, ସାହିତ୍ୟ ଓ ସଂସ୍କୃତି ବିଭାଗ ଏବଂ ଓଡ଼ିଶା ସଙ୍ଗୀତ ନାଟକ ଏକାଡେମୀର ମିଳିତ ଆନୁକୂଲ୍ୟରେ ଆୟୋଜିତ ଏହି ଶୋଭାଯାତ୍ରା ରାମ ମନ୍ଦିରରୁ ଆରମ୍ଭ ହୋଇ ରବୀନ୍ଦ୍ର ମଣ୍ଡପଠାରେ ଶେଷ ହୋଇଥିଲା।

ଏହି ଶୋଭାଯାତ୍ରାରେ ସଂସ୍କୃତି ମନ୍ତ୍ରୀ ସୂର୍ଯ୍ୟବଂଶୀ ସୂରଜ ଯୋଗଦେଇ ପାଇକମାନଙ୍କ ସହ ପଦଯାତ୍ରା କରିଥିଲେ। ସମାବେଶକୁ ସମ୍ବୋଧିତ କରି ସେ କହିଥିଲେ ଯେ, ‘ବନ୍ଦେ ମାତରମ୍‌’ ଜାତୀୟ ଗର୍ବ ଓ ସ୍ୱାଭିମାନର ପ୍ରତୀକ। ଏହାର ଗୌରବମୟ ପରମ୍ପରା ପିଢ଼ି ପରେ ପିଢ଼ିକୁ ପ୍ରେରଣା ଯୋଗାଇ ଚାଲିଥିବ।

ମନ୍ତ୍ରୀ କହିଥିଲେ ଯେ, ଏହି ଜାତୀୟ ସଙ୍ଗୀତର ୧୫୦ତମ ବର୍ଷ ପୂର୍ତ୍ତି ପାଳନ ପାଇଁ ରାଜ୍ୟ ସରକାରଙ୍କ ପକ୍ଷରୁ ବର୍ଷତମାମ ବିଭିନ୍ନ କାର୍ଯ୍ୟକ୍ରମ ଆୟୋଜନ କରାଯାଇଛି। ଜାନୁଆରୀ ୧୨ ତାରିଖ ଜାତୀୟ ଯୁବ ଦିବସ ଅବସରରେ ଓଡ଼ିଶାର ୨୮ ହଜାରରୁ ଅଧିକ ଶିକ୍ଷାନୁଷ୍ଠାନର ୨୯ ଲକ୍ଷରୁ ଅଧିକ ଛାତ୍ରଛାତ୍ରୀ ଏକକାଳୀନ ‘ବନ୍ଦେ ମାତରମ୍‌’ ଗାନ କରିଥିଲେ।

ଶନିବାରର କାର୍ଯ୍ୟକ୍ରମରେ ଓଡ଼ିଶା ସଙ୍ଗୀତ ନାଟକ ଏକାଡେମୀ ପକ୍ଷରୁ ଜାତୀୟ ସଙ୍ଗୀତର ଏକ ସ୍ୱତନ୍ତ୍ର ଓଡ଼ିଆ ଶୈଳୀର ପରିବେଷଣ କରାଯାଇଥିଲା। ପାଇକ ପରିବାରର ମହିଳାମାନେ ପାରମ୍ପରିକ ବେଶଭୂଷାରେ ସଜ୍ଜିତ ହୋଇ ଶୋଭାଯାତ୍ରାରେ ସାମିଲ ହେବା ସହ ନିଜର ଯୁଦ୍ଧକଳା ପ୍ରଦର୍ଶନ କରିଥିଲେ।

ରାଜ୍ୟର ପାରମ୍ପରିକ ଯୁଦ୍ଧକଳା ଓ ଐତିହ୍ୟକୁ ସଂରକ୍ଷିତ ରଖିଥିବାରୁ ମନ୍ତ୍ରୀ ପାଇକମାନଙ୍କୁ ଅଭିନନ୍ଦନ ଜଣାଇଥିଲେ। ଏଥିସହ ଓଡ଼ିଆ ସଂସ୍କୃତିର ସୁରକ୍ଷା ଓ ପ୍ରଚାରପ୍ରସାର ପାଇଁ ସମସ୍ତେ ମିଳିତ ଉଦ୍ୟମ କରିବାକୁ ଆହ୍ୱାନ ଦେଇଥିଲେ।

ଏକାମ୍ର ବିଧାୟକ ବାବୁ ସିଂ ମଧ୍ୟ ପାରମ୍ପରିକ ପାଇକ ଯୁଦ୍ଧକଳାର ସଂରକ୍ଷଣ ଓ ପ୍ରଚାରପ୍ରସାରରେ ଅବଦାନ ପାଇଁ ପାଇକ ସମ୍ପ୍ରଦାୟକୁ ସମ୍ବର୍ଦ୍ଧିତ କରିଥିଲେ।

ଉତ୍ସବରେ ଦେଶାତ୍ମବୋଧକ ସଙ୍ଗୀତ ସହ ସାଂସ୍କୃତିକ ଅନୁଷ୍ଠାନ ‘ଇତିକିଲି ମିତିକିଲି’ର ଶିଶୁ କଳାକାରମାନେ ‘ବନ୍ଦେ ମାତରମ୍‌’ ପରିବେଷଣ କରିଥିଲେ। ଓଡ଼ିଶା ସାହିତ୍ୟ ଏକାଡେମୀ ପକ୍ଷରୁ ‘ବନ୍ଦେ ମାତରମ୍‌’ ଉପରେ ଏକ ପୁସ୍ତକ ଉନ୍ମୋଚନ କରାଯାଇଥିବା ବେଳେ ଏହି ଜାତୀୟ ସଙ୍ଗୀତକୁ ଆଧାର କରି ଏକ ଚିତ୍ରକଳା ପ୍ରଦର୍ଶନୀ ମଧ୍ୟ ଆୟୋଜିତ ହୋଇଥିଲା।

‘ବନ୍ଦେ ମାତରମ୍‌’ର ଉତ୍ପତ୍ତି ହୋଇଥିବା ବଙ୍କିମ ଚନ୍ଦ୍ର ଚାଟାର୍ଜୀଙ୍କ ଉପନ୍ୟାସ ‘ଆନନ୍ଦମଠ’କୁ ଆଧାର କରି ଏକ ନାଟକ ରବୀନ୍ଦ୍ର ମଣ୍ଡପରେ ମଞ୍ଚସ୍ଥ ହୋଇଥିଲା।

ଏହି କାର୍ଯ୍ୟକ୍ରମରେ ଓଡ଼ିଆ ଭାଷା, ସାହିତ୍ୟ ଓ ସଂସ୍କୃତି ବିଭାଗର ସଚିବ ବିଜୟ କେତନ ଉପାଧ୍ୟାୟ, ଓଡ଼ିଶା ସଙ୍ଗୀତ ନାଟକ ଏକାଡେମୀର ସଚିବ ଚନ୍ଦ୍ରଶେଖର ହୋତା, ପ୍ରକାଶ ଶ୍ରୀଚନ୍ଦନ, ଶାନ୍ତନୁ ରଥ ଓ ନିରଞ୍ଜନ ପଣ୍ଡାଙ୍କ ସମେତ ବହୁ ବିଶିଷ୍ଟ ବ୍ୟକ୍ତି ଉପସ୍ଥିତ ଥିଲେ।